Ցուցահանդես — Մայր աստվածուհի. Անահիտից մինչև Մարիամ

Բացառիկ ցուցահանդես. որտեղ անցյալն ու ներկան միավորվում են մայրության կյանք տվող գրկում

Այս տարի սեպտեմբերի 21-ին Հայաստանի Անկախության տոնը կնշանավորվի մշակութային նշանակալից իրադարձությամբ։ Հայաստանի պատմության թանգարանում բացվելու է «Մայր աստվածուհի. Անահիտից մինչև Մարիամ» խորագրով միջազգային ցուցահանդեսը, որում առաջին անգամ Հայաստանում կներկայացվի Անահիտ աստվածուհու հայտնի բրոնզե գլուխն ու ձեռքը, որը ներկայումս գտնվում է հեղինակավոր Բրիտանական թանգարանում։

Կցուցադրվեն ավելի քան վաթսուն ցուցանմուշներ Հայաստանի պատմության թանգարանի հարուստ հավաքածուից, որոնք ներկայացնում են Մայր աստվածուհու հայեցակարգը հեթանոսությունից մինչև քրիստոնեություն, քարից մինչև մետաղ, կավ և թել:

Այս ցուցահանդեսը երկխոսություն է ժամանակների, տարածությունների և երկու թանգարանների միջև՝ կենտրոնացած Մայր աստվածուհու գաղափարի շուրջ՝ որպես կենսատու ուժի և կյանքի շարունակականության խորհրդանիշ:

Ցուցահանդեսը կգործի մինչև 2025 թվականի մարտի 21-ը։