Հիշարժան շաբաթ Հայաստանում

Ժամանում Երևան։ Տեղափոխում  ընտրված հյուրանոց։

Նախաճաշ հյուրանոցում։

Ճանաչողական էքսկուրսիա Երևանի տեսարժան վայրերով՝ հնագույն և միևնույն ժամանակ արդիական, կենսունակ քաղաք՝ բիբլիական Արարատ լեռան շողշողացող ձյունածածկ գագաթների համայնապատկերի ներքո: Շրջագայության ընթացքում  դուք կծանոթանաք քաղաքի կենտրոնական հատվածին և նրա գլխավոր տեսարժան վայրերին՝ Հանրապետության հրապարակին, Հյուսիսային պողոտային, Մայր Հայաստան հուշարձանին, խորհրդարանին, նախագահական նստավայրին,Երևանի համալսարանի և օպերայի շենքերին ու Կարապի լճին։

Այցելություն Ծիծեռնակաբերդ՝    1915 թվականի Հայոց Ցեղասպանության զոհերի հուշահամալիր և Ցեղասպանության թանգարան։ Այն ոգեկոչում է 20-րդ դարի առաջին Ցեղասպանության՝ շուրջ 1,5 մլն արևմտահայության հիշատակը,որ ոչնչացվեց Օսմանյան կայսրությունում պետականորեն մշակված ծրագրով։

Զբոսանք Երևանի Կասկադ համալիրով՝ժամանակակից արվեստի գործերով և քանդակագործական կոմպոզիցիաներով զարդարված գեղեցիկ հանգստավայրում։ Կասկադի գագաթից բացվում է հիասքանչ համայնապատկեր դեպի քաղաք և Արարատ լեռ: Այստեղ է գործում հայտնի Գաֆեսճյան ժամանակակից արվեստի թանգարանը։ Հարմարավետ բացօթյա սրճարանները, արվեստի,մշակույթի շունչը սիրելի են դարձրել այս վայրը տեղացիների և մայրաքաղաքի այցելուների շրջանում։Կասկադը նաև հայտնի է ամառային բացօթյա համերգներով, որը ստեղծում է յուրահատուկ տոնական միջավայր հանգստացողների համար։

Այցելություն Կովկասի ամենամեծ և ամենահին մզկիթներից մեկը՝ «Կապույտ մզկիթը», որը գտնվում է Երևանի սրտում։

Նախաճաշ հյուրանոցում։ Ուղևորություն դեպի Էջմիածին քաղաք, որը նախկինում եղել է Հայաստանի հնագույն մայրաքաղաքներից մեկը։ Այն Հայ Առաքելական եկեղեցու կրոնական կենտրոնն է՝ Ամենայն Հայոց Կաթողիկոսի նստավայրը։ Էջմիածնի տաճարը քրիստոնեական աշխարհի հնագույն եկեղեցիներից է, ընդգրկված ՅՈՒՆԵՍԿՕ-ի Համաշխարհային ժառանգության ցանկում (2000թ.)։  Այն հիմնադրվել է 301 թվականին Սուրբ Գրիգոր Լուսավորչի կողմից։ Հետագայում վերակառուցվել է և ներկայումս գործում է որպես համալիր՝ ներառելով Մայր տաճարը, Հոգևոր ակադեմիան, Ամենայն Հայոց Կաթողիկոսի նստավայրը, Հայ եկեղեցու Սինոդը և գրադարանը։ Տաճարի թանգարանն հարուստ է եզակի ցուցանմուշներով՝ Սուրբ Պատարագի սպասարկման կրոնական իրերի հավաքածու, ոսկուց, արծաթից, թանկարժեք քարերից պատրաստված կրոնական խորհրդանիշներ, զարդեր, մյուռոնի պատրաստման հսկայական արծաթյա կաթսա և Սուրբ Գեղարդը։

Ուղևորություն դեպի Հայաստանի ճարտարապետական ​​հրաշալիքներից մեկը՝ Զվարթնոցի տաճար (641-661թթ.), որն իր անվանումն ստացել է «Զվարթ» բառից: Պահպանված ավերակները պատկերացում են տալիս այս տաճարի հազվագյուտ գեղեցկության և աներևակայելի ճարտարապետական լուծումների մասին։ Տաճարը ներառված է ՅՈՒՆԵՍԿՕ-ի համաշխարհային ժառանգության ցանկում (2000 թ.):

Վերադարձ և գիշերակաց Երևանում։

Նախաճաշ հյուրանոցում։

Ուղևորություն Արարատյան դաշտավայրով  Խոր Վիրապ վանք, որը քրիստոնեական աշխարհի սրբավայրերից  է։ Այստեղից բացվում է հիասքանչ տեսարան դեպի Աստվածաշնչյան լեռ՝ Արարատ, իր երկու ձյունափառ գագաթներով։

Խոր Վիրապ այցից հետո  ճանապարհը  ձգվում է Գնիշիկի կիրճով, որն ցնցում է նեղ ճանապարհի վրա վեր խոյացած  կարմրագույն ժայռերի բնապատկերով։ Այցելություն Նորավանք վանական համալիր ( 13-14-րդ դդ)։ Նորավանք տանող ճանապարհին այնքան անհավանական գեղեցիկ է, որ այցելուները չեն կարողանում դիմադրել մեքենայից դուրս գալու և  դեպի վանք քայլելու գայթակղությանը՝ վայելելով բնության պարգևած հրաշալի տեսարանները։

Ուղևորության շարունակում դեպի Տաթևի վանական համալիր ( 9-10-րդ դդ ), որը Հայ ճարտարապետական մտքի թռիչք հանդիսացող կառույց է, վեր հառնած  խորը կիրճի զառիթափին՝ շրջապատված խորունկ, անտառապատ կիրճերով։ Այն  9-13-րդ դարերում եղել է հայ մշակույթի նշանավոր կենտրոն, որտեղ ապրել են փիլիսոփաներ, երաժիշտներ, նկարիչներ, գեղագիրներ և վանականներ: Անցեք դեպի Տաթևի վանք խորունկ ձորերի վրայով ձգվող աշխարհի ամենաերկար ճոպանուղով (5,7 կմ), որը գրանցված է Գինեսի ռեկորդների գրքում։

Վերադարձ և գիշերակաց Երևանում։

Նախաճաշ հյուրանոցում։

Ուղևորություն դեպի Սևանա լիճ՝ Հայաստանի հրաշալիքներից մեկը։ Այս կապույտ գեղեցկուհին Եվրասիայի ամենաբարձր լեռնային քաղցրահամ լճերից մեկն է։ Պարզ և արևոտ օրերին յճի  ջրերը մուգ փիրուզագույն երանգ են ստանում՝ անհավանական գեղեցկություն հաղորդելով  940 կմ2 մակերես ունեցող բնության այս հրաշքին։

Դեպի թերակղզի բարձրանալիս այցելուների առջև բացվում է շրջակա լեռների գրկում հանգստացող լճի  չքնաղ տեսարանը։ Հիացեք 9-րդ դարում կառուցված Սևանավանքով, որ դարերի խորհուրդն իր մեջ կրելով, վեհորեն իշխում է Սևանա կապույտի վրա։

Ուղևորություն դեպի լեռնային հանգստավայր Դիլիջան կամ այսպես կոչված «Հայկական Շվեյցարիա», որը հայտնի է իր անտառներով, ինչպես նաև իր բազմերանգ բուսական և կենդանական աշխարհով:

Զբոսանք Դիլիջանի արհեստագործական թաղամասով , որտեղ տեղացի արհեստավորները պատրաստում են փայտից, քարից և կավից ձեռագործ հուշանվերներ:

Այցելություն Հաղարծինի վանական համալիր, որը գտնվում է մեկուսի և խորն անտառում: Հաղարծինը թվագրվում է XI-XIII դ և միջնադարյան հայ վանական ճարտարապետության գլուխգործոցներից է: Անսպասելիորեն հայտնվելով այցելուների առջև խիտ անտառներից՝ վանքը ստեղծում է կորուսյալ աշխարհի կախարդական տպավորություն։ Վանական համալիրը ներառում է Սուրբ Ստեփանոս, Սուրբ Մարիամ և Սուրբ Գրիգոր եկեղեցիները, ինչպես նաև հայտնի սեղանատունը, որը միջնադարյան հայկական ճարտարապետության լավագույն նմուշներից է:

2005 թվականին վանք այցելելուց հետո, Նորին Մեծություն Շեյխ Սուլթան բին Մոհամմեդ Ալ Քասիմին առատաձեռն նվիրատվություն կատարեց  վանքի վերանորոգման և պահպանման համար՝ իբրև  մարդկության հարուստ պատմության գեղեցիկ վկայության:

Վերադարձ և գիշերակաց  Երևանում:

Նախաճաշ հյուրանոցում։

Այցելություն Գառնիում գտնվող  արևի աստծոն՝ Միհրին  նվիրված Հայաստանում եզակի պահպանված հեթանոսական տաճար։Ճանապարհին լուսանկարչական կանգառ Չարենցի կամարի մոտ։ Այցելություն  թագավորական պալատի և  բաղնիքի հնավայրեր։

Կամընտրելի․ Ընտանեկան ճաշ մասնավոր գյուղական տանը, հայկական ավանդական հացի՝լավաշի հարյուրամյակներ շարունակվող տեխնոլոգիայով պատրաստման ցուցադրությամբ։

Շարունակեք շրջագայությունը դեպի հայ ճարտարապետական մտքի թռիչքներից մեկը հանդիսացող կիսաքարանձավային Գեղարդավանք, որը թվագրվում է 12-13-րդ դարերով և իր անունը ստացել է Սուրբ գեղարդից։ Խաչված Քրիստոսի մարմինը խոցած Սուրբ մասունքը Հայաստան էր  բերվել Սբ Թադեոս առաքյալի կողմից և նախքան Սբ Էջմիածին տեղափոխելը,դարեր շարունակ պահպանվում էր վանական համալիրում։

Վերադարձ և գիշերակաց Երևանում։

Նախաճաշ հյուրանոցում։

Ուղևորություն դեպի Ծաղկաձոր հանգստավայր՝ անտառապատ լեռների ծոցում հագրվանած կախարդական վայր։ Կարճ զբոսանք  քաղաքում։ Այցելություն Կեչառիս վանական համալիր (11-13-րդ դդ.)։

Հնարավորություն ճոպանուղով բարձրանալու Կեցառիս լեռան գագաթներ, որտեղից բացվում է հայկական լեռնաշխարհի այս հատվածի անմոռանալի հիասքանչ համայնապատկերը։

Վերադարձ  Երևան։

Այցելություն Մրգերի շուկա։Զբոսանք Վերնիսաժում՝ արհեստագործական և ձեռագործ արվեստի բացօթյա ցուցահանդես-շուկայում։ Գնումներ կատարելու համար այցելեք <<Դալմա Գարդեն>>, <<Երևան Մոլ>>, կամ <<Մեգամոլ>> առևտրային կենտրոնները։ Մասնագիտացված խանութներ՝ ըստ պահանջի։

Նախաճաշ հյուրանոցում։  Տեղափոխում  «Զվարթնոց» միջազգային օդանավակայան։